Ei leh in leh nunphungah mi tinin Dikna chanvo kan nei - BJP thupuangtu
BJP thupuangtu Nalin Kohli chuan, India ram chêng zawng zawngte'n ei leh in leh nunphungah duh thlanna an neih vek thu sawiin, "Hengte hi kan inzah tawnsak tur a ni a, mi tinin dikna chanvo kan nei vek a ni," a ti.
Inrinni zan khan Nalin Kohli hi Mizorama BJP pisaah thuthar thehdarhtute nen an inkâwm a; zawhna chhangin Kohli chuan, "India ram hmun hrang hrang chengte'n ei leh in duh zawng leh nunphung kan nei vek. Bawng sa ei duh lo te, vawksa ei duh lo te, sangha chauh eite an awm a, chung chu mimal duh thlanna a ni. Tumah ei leh in leh nun dan phungah intihluih theih a ni lo. India Constitution chuan India khua leh tui zawng zawngte chu dikna chanvo mi pe vek a ni," a ti a; BJP chu India Constitution-a innghat a nih thu a sawi.
Nalin Kohli chuan, Mizoram Chief Minister-in an party a sawi chhiat ṭhin chungchangah, "Kan tan chuan a lawmawm hle. A hmalakna sawi tur a hre lo a, BJP sawichhiat lamah ṭan a la a ni. Kum 10 an sorkar chhungin hna thawk se chuan, chu'ngte chu a sawi ang chu. Engmah sawi tur a nei lo a ni ang," a ti.
Mizoram kawngpuite chu chhia a tih thu sawiin BJP thupuangtu chuan, "Narendra Modi hnuaia development for all kalpui a nih hnuah state hrang hrang kawng a ṭha a ni. Development for all hi Mizoramin a chhawr ve lo, a chhan chu corruption vang a ni. Tu emawin sum an ei avangin kawng ṭha nei loin, kawng chhia in neih phah a ni. BJP sorkarna state-ah chuan kawng in hma a sawn zel," a ti a; Mizoram kawng chhiat reng chhan sawifiah tura Mizoram sorkar an phût thu a sawi.
Comments
Post a Comment