Kohhrana a rawngbawlna chawlhsan turin MPCC-in BJP president

Congress party Media department chairman Lallianchhunga chuan, BJP Mizoram Pradesh president Prof. JV Hluna'n media hmaah dâwt chiang tak a sawi tih sawiin, chumi avang leh Kristiante thinhrik BJP a zawm avangin a awmna kohhrana a rawngbawlnate chu chawlhsan turin an phût tih a sawi.

MPCC Media department chuan nimin khan Aizawl Press Club-ah thurthar theh-darhtute an kâwm a; Lallianchhunga chuan, Aizawla ni tin chanchinbu pakhatin a tarlan, Mizoram BJP president JV Hluna'n 'Congress nen kan thawhho a rinawm' tia a sawi chu dâwt chiang tak a nih thu a sawi a, "Patling puiin BJP hruaitu a nih vanga dawt a sawi hoi a vanduaithlak a, kohhran mipuite thinhrik BJP a zawm avang hian kohhrana a rawngbawlna pawh hi chawlhsan ngam turin Pu JV Hluna hi kan ngen a ni," a ti.

Lallianchhunga chuan, BJP leh MNF party-te chu thawkho turin a rûkin an inrem sa vek tawh nia sawiin, "BJP nen kan thawkho lo, tia ring taka an aupui hi Amit Shah leh Ram Madhav te finrawl, mipui ngaih tih-

ṭhatna mai a ni," a ti a; nagaland, Meghalaya leh Manipur mipuite anga chesual ve lo tura Mizo mipui chahin, BJP thunun theih loh Congress party vote turin mipui a ngen a ni.

MPCC Media Chairman chuan, Congress party-in sor-karna an chan chhunzawm leh ngei dawnin a lang nia sawiin, an sorkar leh chuan Aizawla taxi-te intlàn chhâwk dan tihdanglam a nih dawn thu a sawi a, "Aizawla taxi-te hi tuna private motor intlân chhâwk ang hian, registration number tawp dan ang zelin an intlân chhâwk ang a, A, B leh C anga intlan chhâwk a bo tawh ang," a ti.

MPCC Media hotute chuan, central sorkara thuneihna changtu BJP-te chu an sual hle nia sawiin, Congress party president Rahul Gandhi-a Aizawla a campaign tur chu an tibuai char char tih an sawi a; chuti chung chuan, vawiinah hian Rahul Gandhi-a'n Mizoram a rawn tlawh dawn a, Aizawl leh Champhaiah thu a sawi dawn tih an tarlang.

Lallianchhunga sawi danin, Rahul Gandhi hi October 5, 2018-ah Aizawlah lo kal a tum a, chuta tan chuan Lammual hman phalna September 21, 2018-ah Assam Rifles-ah an thehlut a, mahse, Lammual chu infiamna (sport) lam atan chauh hman phal a nih thu sawiin an lo hnawlsak a ni. Chumi hnuah, November 22-a prime minister Narendra Modi-a BJP tana Aizawla a campaign-na tur-ah, Lammualah vantlang inkhawm buatsaih phalsak a ni thung.

Narendra Modi puala Lammuala vantlang inkhawm buatsaih phalsak a nih avangin MPCC chuan November 18, Pathianni khan 23 Sector AR hotute hnenah Lammual hman dilna an thehlut ve leh a; mahse, an dilna chu an lo hnâwlsak leh a ni.

Lallianchhunga chuan, Narendra Modi leh Rahul Gandhi te chu venhimna lamah Z-Plus category ve ve an nih thu leh Mizorama an rawn kal chhan chu Mizoram inthlana campaign tur an nih ve ve thu a sawi a; Narendra Modi tana AR-in Lammual hman an phalsak bik chungchangah, "Ministry of Home Affairs, Delhi aṭangin ṭawngkaa tihluihna an dawn avangin BJP hi kan pe lo thei lo a ni, tiin an sawi," a ti.

Hetih lai hian, nimin tlai khan Assam Rifles hotute chuan Rahul Gandhi puala vantlang inkhawm neihna atan Lammual hman an phalsak leh ta nia thu dawn a ni.